Bu ölkəyə daha alim gərək deyil? "Bizi yenidən başa qayıtmağa vadar edirlər"

 "Fiziki və hüquqi şəxslərin hüquqi vəziyyətini yaxşılaşdıran, hüquq məsuliyyətini aradan qaldıran və ya yüngülləşdirən normativ hüquqi aktların qüvvəsi geriyə şamil edilir. Başqa normativ hüquqi aktların qüvvəsi geriyə şamil edilmir. AAK-ın məlum kollegiya qərarı qəbul edildiyi tarixdən özündən əvvəlki bütün instansiya, şura qərarlarnın ləğvini tələb edir. Müdafiə üçün növbəyə qeydiyyata düşənlərin də, elmi seminarı verənlərin də, elmi seminarın nəticələrinin şurada gündəliyə çıxarılıb ixtisas şifrinə müvafiq ekspertlərə rəyə göndərilənlərin də, müsbət ekspert rəyi alan iddiaçıların da əldə etdiyi bütün nəticələr eyni anda sıfırlanır. Belə çıxır ki, biz bir də başa qayıtmalıyıq. Halbuki alimlər bizim seminarlarda iştirakımızla bağlı rəy yazıblar. Fəlsəfə doktoru elmi adı almaq üçün müzakirədən keçmiş dissertasiyaların yenidən ilkin müzakirəyə və elmi seminara qaytarılması qərarı kökündən yanlışdır".

 

2018-ci ilə kimi elmi dərəcəni alan bəzi alimlər indi AAK-ın keçmiş fəaliyyətinin kafi olmadığını təsdiqləyirlər: "O alimlər də o zamankı fəaliyyət dövründə namizədlik, doktorluq, professorluq elmi dərəcə və adlarını alıblar. Belə çıxır ki, onlar da yenidən başa qayıtmalıdırlar".

Adının çəkilməsini istəməyən gənc alimlər Sputnik Azərbaycan-a açıqlamalarında AAK-ın bu qərarından narazılıqlarını ifadə ediblər: "İlkin müzakirə və seminardan keçmiş dissertantların elmi işlərinin ilkin müzakirəyə qaytarılması qərarından narazılıq kütləvidir. Burada söhbət bir və yaxud iki nəfərin narazılığından getmir. Elmi adların verilməsini belə sadələşdirmirlər. İndi Ali Attestasiya Komissiyası sədri Famil Mustafayevin qərarı ilə seminarı yenidən verməliyik. Nəticədə dissertantlar bu prosesi 4 dəfə vermiş olacaqlar. Bu isə sadələşdirmək yox, daha da çətinləşdirməkdir. Bizə deyilir ki, AAK-ın Ekspert Şurası yeni əsasnamələrlə işləyir, ona görə köhnə əsasnamələrə uyğun gəlmiş seminarı qəbul edə bilməz. Buna görə də elmi işlərinizi dəyişib yenidən verməlisiz. Bizimlə eyni ildə, hətta bizdən sonra da qəbul olanlar növbədənkənar müxtəlif yollarla işlərini irəli çəkib diplomlarını aldılar. Biz isə qanunla öz növbəmizi gözlədik. İndi əgər bu qərar 2011-ci ildə qəbul olanlara da şamil edilirsə, onda həmin ildə və həmin ildən sonra qəbul olub diplomlarını alanların da diplomları ləğv edilsin. Onlar da bizimlə bərabər yeni qaydalarla müzakirələrdən yenidən keçsinlər. Ədalətli qərar belə olmalıdır!"

Həmsöhbətlərimiz bildirirlər ki, bu problemə bağlı mətbuata öz dərdini danışmaq istəyənlər çox olsa da, doktorantlara işlədikləri yerlərdən, ali məktəblərdən təzyiqlər edilir ki, danışmasınlar, sussunlar, Ali Attestasiya Komissiyasının qərarı ilə razılaşsınlar.

Əldə etdiyimiz məlumata görə, müzakirədən uğurla keçmiş elmi işləri geri qaytarılanlar arasında xarici vətəndaşlar da az deyil.

Ən böyük narazılıq doğuran məqam isə şikayətçilərin Ali Attestasiya Komissiyası rəhbərliyinin qəbuluna düşə bilməmələri, yazdıqları məktub və müraciətlərə heç bir cavab verilməməsidir. Onlar bildirirlər ki, dönə-dönə qəbula yazılmağa cəhd ediblər, qurumun elektron poçtuna məktublar göndəriblər, amma onlara heç bir reaksiya verilməyib.

Azərbaycan Gənc Alim, Aspirant və Magistrlər Cəmiyyətinin sədri İlqar Orucov Sputnik Azərbaycan-a açıqlamasında bildirib ki, Azərbaycanda Ali Attestasiya Komissiyasının fəaliyyəti özünü doğrultmur: "AAK-ın bu qərarı, elm üçün bürokratik əngəldir.

Elm adamları üçün geniş imkanlar yaradılmalıdır. Nəinki onları bu cür bürokratik əngəllərlə incitmək. Ölkə başçısı səviyyəsində Ali Attestasiya Komissiyasından böyük gözlənti var. Amma yenə bu qurum alimləri incitməklə məşğuldur. Bu işlər xaricdə nə cürdüsə, biz də elə etməliyik. Dissertasiya şuralarının hamısı formal strukturlara çevrilib. Onların çoxu saxtakarlığa yol verib. Amma onlara olan inamsızlıq üzündən bir il öncə müzakirədən keçmiş işin yenidən müzakirəyə qaytarılması düzgün deyil.

Nəzərə almaq lazımdır ki, qanunun geriyə qüvvəsi yoxdur. Bütün hallarda qanunsuz yolla bu insanları yenidən müzakirələrə çağırırlar. Əziyyət çəkən insanlar öz ixtisaslarına yiyələnə bilmirlər, məmurlar müxtəlif yollarla, növbədənkənar müdafiə edib gedirlər".