Bu il Prezident təqaüdünə layiq görülənlərdən 26-sı Bakı Ali Neft Məktəbinin tələbəsidir

Sentyabrın 14-də Bakı Ali Neft Məktəbində (BANM) 2018-2019-cu dərs ilinin başlanması ilə əlaqədar tədbir keçirilib.

AZƏRTAC xəbər verir ki, tədbirdə BANM-in rektoru Elmar Qasımov bu ali məktəbə qəbul olunan tələbələri və onların valideynlərini təbrik edib. BANM-in əldə etdiyi uğurlardan danışan rektor diqqətə çatdırıb ki, bu il Prezident təqaüdünə layiq görülənlərdən 26-sı bu ali təhsil ocağının tələbəsidir. Bu il birinci qrup üzrə qəbul imtahanlarında 700 bal toplamış 13 nəfərin hamısı BANM-i seçib. Ötənilki kimi bu il də ölkə üzrə ən yüksək keçid balı BANM-in yeni informasiya təhlükəsizliyi ixtisasına olub.

Azərbaycan Respublikası Dövlət Neft Şirkətinin (SOCAR) prezidenti Rövnəq Abdullayev, BP-nin Azərbaycan, Gürcüstan və Türkiyə üzrə regional prezidenti Qəri Counz, BMT baş katibinin müavin, qurumun Təlim və Tədqiqat İnstitutunun (UNITAR) icraçı direktoru Nikhil Set və başqaları BANM-in əldə etdiyi uğurlarından danışıblar. Diqqətə çatdırılıb ki, bu ali məktəbin məzunları hazırda dünyanın tanınmış şirkətlərində aparıcı mütəxəssislər kimi fəaliyyət göstərirlər.