Bu brauzerdə təhlükəli boşluq aşkar edilib

“Windows 10” əməliyyat sistemində aşkar edilmiş boşluq hakerlərə sərt diskdə saxlanılan fayllara məsafədən müdaxilə etməyə imkan verir. Bu, istifadəçilərin “Microsoft Edge” brauzerində zərərverici faylı işə salması nəticəsində mümkün olur.

“ICTnews” Elektron Xəbər Xidməti “news.rambler.ru” saytına istinadən yazır ki, təhlükəsizlik üzrə mütəxəssis Con Peyc ilk öncə “Microsoft”un “Internet Explorer 11” brauzerində aşkar edilmiş boşluq haqda məlumat vermişdi. Bu boşluğun köməyi ilə “Windows” sisteminin fayllarına müdaxilə mümkün idi. “Qurban” poçt və ya messencerlə göndərilmiş faylları açarkən hücum reallaşırdı.

Bundan sonra “ACROS Security” şirkətinin mütəxəssisi aşkar edib ki, sözügedən boşluq yalnız köhnə “Internet Explorer”də deyil, həm də daha müasir “Edge” brauzerində mövcuddur. Yeni brauzer, həmçinin zərərverici faylın işə salmaq icazəsini özündə saxlayır və beləliklə, istifadəçilər təhlükə altındadır.