Azərbaycanda turizmlə bağlı layihəyə sənəd qəbulunun müddəti uzadılıb

Azərbaycan Turizm Bürosunun (ATB) ölkədə gəlmə turizmi ilə məşğul olan şirkətlərə post-pandemiya dövründə fəaliyyətlərinə dəstək olmaq, həmçinin bu sahədə innovativ və rəqəmsal yanaşmanı inkişaf etdirmək məqsədilə başlatdığı layihəyə sənəd qəbulunun müddəti uzadılıb.

Ens.az xəbər verir ki,bu barədə “Report”a Dövlət Turizm Agentliyindən bildirilib. 

Daha çox şirkətin layihənin imkanlarından yararlanması üçün müraciət müddəti 9 oktyabra qədər artırılıb. 

Xatırladaq ki, sentyabrın 8-də start verilən layihənin əsas məqsədi turizm destinasiyası kimi Azərbaycan və onun turizm imkanları haqqında məlumatların onlayn rejimdə rəqəmsal platformalarda yerləşdirilməsini təmin edən layihələrə dəstək göstərilməsidir.

Layihə Azərbaycan Turizm Agentlikləri Assosiasiyası (ATAA) və Azərbaycan Turizm Assosiasiyası (AZTA) ilə birgə həyata keçirilir.

Proqram yalnız xüsusi meyarlara cavab verən gəlmə turizmi ilə məşğul olan şirkətlər üçün nəzərdə tutulub.

Müraciətlər yeni layihələrlə, həmçinin mövcud olan onlayn layihələrə əlavə kimi və ya hazır platformaların təkmilləşdirilməsi ilə bağlı ola bilər.

Müraciət və iştirak meyarları barədə ətraflı məlumat üçün https://tourismboard.az/az/page/522-reqemsallasdirilma-layihesi keçidinə daxil olmaq lazımdır.