Azərbaycan Ali Hərbi Məktəbində buraxılış mərasimi keçirilib

Bu gün Heydər Əliyev adına Azərbaycan Ali Hərbi Məktəbində 2019-cu il buraxılışına həsr olunan təntənəli mərasim keçirilib.

"Report" xəbərinə görə, mərasimdə Müdafiə Nazirliyinin rəhbərliyi, yüksək rütbəli zabitlər, Ali Hərbi Məktəbin, ictimaiyyətin nümayəndələri, veteranlar, məzunların ailə üzvləri və yaxınları iştirak ediblər.

Əvvəlcə ümummilli lider Heydər Əliyevin və Azərbaycanın müstəqilliyi uğrunda canlarından keçmiş şəhidlərin xatirəsi bir dəqiqəlik sükutla yad olunub.

Nazirliyin nümunəvi hərbi orkestrinin və kursantların ifasında Azərbaycanın Dövlət Himni səsləndirilib.

Çıxış edən Silahlı Qüvvələrin Baş Qərargah rəisinin müavini – Müdafiə Nazirliyinin Döyüş Hazırlığı və Hərbi Təhsil Baş İdarəsinin rəisi, general-leytenant Nizam Osmanov əlamətdar gün və Silahlı Qüvvələrin yaradılmasının 101 illiyi münasibətilə gənc zabitləri və onların valideynlərini təbrik edib.

N.Osmanov məzunlara ölkənin gələcəyi, ordunun, dövlətin müdafiə qüdrətinin daha da yüksəldilməsi naminə xidmətlərində uğurlar diləyib.

Sonra ali hərbi məktəbi fərqlənmə ilə bitirən məzunlara diplomlar və qiymətli hədiyyələr təqdim olunub.

Məktəbi fərqlənmə ilə bitirən məzunlar üzərində ulduz və aypara təsviri olan emblemləri rəmzi yaş kötüklərinə vurublar.

Daha sonra Heydər Əliyev adına Azərbaycan Ali Hərbi Məktəbinin döyüş bayrağının təhvil verilməsi və qəbul edilməsi mərasimi olub. Ali Hərbi Məktəbin döyüş bayrağı növbəti buraxılışın kursantlarına təhvil verilib. Nümunəvi orkestrin və kursantların ifasında məktəbin marşı ifa edilib.

Sonda kursantlar hərbi marşın sədaları altında tribunanın önündən keçiblər.