Avstriyada 10 min İKT mütəxəssisinə ehtiyac var

Müasir dünyamızda informasiya və kommunikasiya texnologiyalarının (İKT) inkişafı və onların gündəlik həyatımıza getdikcə daha çox nüfuzu istehsalatda bu sahə üzrə mütəxəssislərə tələbatı da artırır.

AZƏRTAC xəbər verir ki, hazırda Avstriya iqtisadiyyatında İKT üzrə 10 min yüksək peşəkarlığa malik mütəxəssisə ehtiyac var. Bu barədə məlumatı Avstriya İqtisadiyyat Palatasının əməkdaşı Alfred Harl “2019-cu il üzrə İKT status hesabatı”nı təqdim edərkən bildirib. Son illərdə İKT mütəxəssislərinə tələbatın, xüsusilə, sənaye müəssisələrində artdığını vurğulayan iqtisadçı ölkənin ali təhsil müəssisələrinə informatika sahəsinə aid ixtisaslar üzrə daha çox tələbələrin qəbul olunmasının vacibliyini qeyd edib. O, Avstriyanın yaxın gələcəkdə “digiNation” (rəqəmsal millət) ola bilməsi üçün hökumətdən İKT sahəsinə xüsusi diqqət ayırmağı tələb edib, həm ölkənin yerli iqtisadiyyatı, həm də xaricdə işləmək üçün peşəkar mütəxəssislərin yetişdirilməli olduğunu vurğulayıb.

Hazırda Avstriya universitet və texnikumlarında ümumilikdə 2 min tələbə İKT ixtisasları üzrə təhsil alırlar. A.Harl bu rəqəmin beş minə çatdırılması və həmçinin qadınların İKT sahəsinə marağının artırılması üçün xüsusi proqramların həyata keçirilməsini vacib hesab edib.

Qeyd edək ki, Avstriyada yüksək peşəkarlıq tələb edilən sahələr üzrə mütəxəssis çatışmazlığı hökm sürsə də, ölkənin miqrasiya qanunları bu ölkəyə yerləşmək istəyən peşəkar kadrların önünü kəsir. Olduqca çoxlu sayda maneələrdən ibarət sərt qaydaları nəzərə alan peşəkarlar Avstriyadansa, daha yüksək əməkhaqqı və sadə miqrasiya qanunları olan ölkələrə üstünlük verirlər. Məhz buna görə də İqtisadiyyat Palatası ali təhsil müəssisələrində tələbə sayının artırılması ilə kadr çatışmazlığı probleminin qarşısının alınacağına ümid edir.