Aşıq Bəsti - Səni min yaşa, ay Məhəmməd
Hünərinə el hayrandı,
Səni min yaşa, ay Məhəmməd!
Camalına can qurbandı,
Boyun tamaşa, ay Məhəmməd!
Beşaçılanın gülləsindən,
Dağlar titrəyir səsindən.
Koroğlu tək nərəsindən,
Gözlər qamaşa, ay Məhəmməd!
Sən Bəstinin tərlanısan,
Bu dağların aslanısan.
Bu könlümün dastanısan,
Sən gəl, keç başa, ay Məhəmməd!
Məqaləni bəyəndiniz? Sosial şəbəkələrdə izləyin!
Şərhlər
Şərhləri göstər Şərhləri gizlət