Aşıq Bəsti - A Qurban

Aşıq Bəsti - A Qurban

Acı ruzgar döydü ömür qapımı, 
Qara döndü ağ dövranım, a Qurban! 
Dağlarımı duman aldı, çən aldı, 
Zülmət oldu asimanım, a Qurban!

Bu yazıq canımı gətirdi cana, 
Ədalətsiz divan, zalım zamana, 
Atəşə pərvanə, oxa nişanə,
Piltəyə şam oldu canım, a Qurban!

Tər şamama bu tağlardan kəsildi, 
Ömr ağacı budaqlardan kəsildi. 
Tütək səsi bu dağlardan kəsildi, 
Hayıf oldu Xançobanım, a Qurban!

Aylarım bəd gəlib, illərim nəsdi,
O azca ülfəti fələk də kəsdi,
Dünya zindan oldu, məhbusu Bəsti, 
Yaşamağa yox gümanım, a Qurban!