Aşıq Alı - Yara yar

Aşıq Alı - Yara yar

Qəddah qəhr eyləsə, dərdi sər artar,
Sədasından həsrət qalar yara yar.^[1] 
Aşiq sənsən yara yar,^[2]
Dərd səddini yar, a yar.^[3]
Tənha qalan haraylar,
Dada yetiş, yar, a yar.^[4]
Hədyan ərz eyləsə nadan lisanı,^[5] 
Sadiq qalar sənə aqil yar ayar.^[6] 

Dərdikeş qayəsi dərdə sarıdı,^[7] 
Əyirdi dərdləri dərdə sarıdı.^[8] 
Aşiq dərdə sarıdı,^[9]
Dərd əsiri sarıdı.^[10]
Qəsrin şahə layiqdi,
Nədən rəngi sarıdı?^[11]
Canansız xanələr dərd əsarıdı,^[12] 
Əhli-hallar yar dərdinə yarayar.^[13] 

Qəhrin sədasına tərsalar ağlar,^[14] 
Can naçar qalanda, tər salar ağlar.^[15] 
Aşiq tər salar, ağlar,
Yaylıq tər salar, ağlar.^[16]
Haqqına ar alana,^[17]
Desən, tərs alar, ağlar.^[18]
Alı yaddan çara tərs alar, ağlar,^[19] 
Yar yaranda, sayalanar yara, yar.^[20]

İzahlar

1. ↑ yarın yardan ayrı düşməsi
2. ↑ sən aşiqin yarısan
3. ↑ yarmaq, dağıtmaq
4. ↑ yara müraciət
5. ↑ nadan dedi-qodusunu yayanlara inanmayan
6. ↑ yar səni başa düşər, anlayar-ayar
7. ↑ dərd çəkənin yönü dərdə tərəfdi-sarıdı
8. ↑ dərdin üstünə dərd gətirdi-sarıdı
9. ↑ aşiq dərdə meillidi-sarıdı
10. ↑ dərd çəkənin rəngi sarıdı
11. ↑ rəngi niyə sarı rəngdədi
12. ↑ dərd bazarı-əsarıdı
13. ↑ yarayar-kömək edər
14. ↑ tufandan, qiyamətdən Yaradana inanmayan, naümidlər
15. ↑ dəhşətə gələr, qorxarlar, inananlar Tanrıdan kömək diləyər. dərdinə əlac tapmayan düşünməkdən, hərarətdən tərləyər
16. ↑ Yaylıqla təri silərkən sarı ləkə -tər salar, islanar, sıxanda
17. ↑ su tökülər-ağlar
18. ↑ şərxətərə öyüd versən, tərs anlayar-hikməti dərk etməz
19. ↑ canı yanmayan dərdinin çarəsini tərs deyər-qurtarmazsan
20. ↑ ağlarsan-əzab çəkərsən. yara-sayalanar-qurtarar