AMEA-da “Heydər Əliyev İli” çərçivəsində YAP Yasamal rayon təşkilatının tədbiri keçirilib

 “Heydər Əliyev İli” çərçivəsində AMEA-nın Mərkəzi Elmi Kitabxanasında Yeni Azərbaycan Partiyası Yasamal rayon təşkilatı ilə bu qurumun AMEA Rəyasət Heyəti üzrə ərazi partiya təşkilatının birgə tədbiri keçirilib.

Əvvəlcə tədbir iştirakçıları Ulu Öndər Heydər Əliyevin Mərkəzi Elmi Kitabxanadakı büstü önünə gül dəstələri qoyaraq, dahi liderin əziz xatirəsini ehtiramla yad ediblər.

Daha sonra görkəmli dövlət xadimi Heydər Əliyevin həyat və fəaliyyətini əks etdirən nəşrlərdən ibarət sərgiyə baxış keçirilib.

Tədbirdə əvvəlcə Azərbaycan Respublikasının Dövlət Himni səsləndirilib.

Sonra Ulu Öndər Heydər Əliyevin və ölkəmizin ərazi bütövlüyü uğrunda həlak olmuş şəhidlərin əziz xatirəsi bir dəqiqəlik sükutla yad edilib.

Tədbiri giriş sözü ilə YAP Yasamal rayon təşkilatının sədri Bəxtiyar Nəbiyev açaraq Ulu Öndər Heydər Əliyevin Azərbaycan xalqının və dövlətinin həyatındakı tarixi xilaskarlıq missiyasından söz açıb. Bildirib ki, Heydər Əliyevin Azərbaycana rəhbərlik etdiyi dövrlərdə həyata keçirdiyi strategiya bütün sahələrdə əldə edilən uğurların əsasını təşkil edir. Görkəmli dövlət xadimi xalqımızın və dövlətimizin qarşısında duran çətinlikləri aradan qaldırmaqla Azərbaycan dövlətini qısa zamanda hüquqi, dünyəvi, demokratik dövlətə çevirib.

 “Heydər Əliyevin xalqımıza ən böyük töhfəsi heç şübhəsiz ki, bu gün dünya siyasətinin fenomeni olan Prezident İlham Əliyev kimi siyasi varisini yetişdirməsi oldu. 2003-cü ildə xalqımızın birmənalı dəstəyi ilə Prezident seçilən İlham Əliyev ötən illər ərzində sarsılmaz təməlləri Ulu Öndər Heydər Əliyev tərəfindən qoyulan dövlətçilik siyasətini əzmlə və qətiyyətlə həyata keçirərək ölkəmizi dünyanın qüdrətli dövlətlərindən birinə çevirdi. Müzəffər Ali Baş Komandan İlham Əliyevin iradəsi və qətiyyəti sayəsində cəmi 44 gün ərzində torpaqlarımız erməni işğalından azad edildi, tarixi Zəfər qazanıldı”, - deyə Bəxtiyar Nəbiyev vurğulayıb.

Sonra Heydər Əliyevin şərəfli həyat yolundan və müdrik siyasi fəaliyyətindən bəhs edən videoçarx nümayiş olunub.

Tədbirdə AMEA-nın prezidenti, akademik İsa Həbibbəyli çıxış edərək Azərbaycanın intibahının Ulu Öndərin hakimiyyətə gəlişi ilə başladığını bildirib, Heydər Əliyevin hakimiyyəti illərində Azərbaycanda dövlət quruculuğu sahəsində görülən işlərdən bəhs edib. Bildirib ki, görkəmli dövlət xadiminin hakimiyyəti illərində ölkəmizdə iqtisadiyyat, sosial sahə, sənayeləşmə, aqrar sahə, elm, təhsil, mədəniyyət və digər sahələr özünün yüksək inkişaf səviyyəsinə çatmış, Azərbaycan keçmiş Sovet İttifaqına daxil olan ölkələr arasında ən inkişaf etmiş dövlətlərdən birinə çevrilmişdir.

AMEA rəhbəri qeyd edib ki, Heydər Əliyevin elm və təhsilimizin inkişafına göstərdiyi xüsusi dəstək, ana dilimizin təkmilləşdirilməsi istiqamətində atdığı əhəmiyyətli addımlar Ulu Öndərin ölkəsinə sadiq, milli ruhlu lider olduğunu bir daha nümayiş etdirir. Dahi lider Heydər Əliyevin Azərbaycan xalqını mənəvi dəyərlərin qorunması vasitəsilə milli köklərə bağlamaqla və milli-mənəvi özünüdərk proseslərini dərinləşdirməklə gələcək müstəqilliyə hazırladığını vurğulayan akademik İsa Həbibbəyli  bildirib ki, elm, mədəniyyət, ədəbiyyat siyasəti, ilk növbədə, bu sahələrin inkişafına yönəldilməklə yanaşı, xalqa öz qədim tarixə malik dövlətçiliyini, milli mənliyini dərk etməyə şərait yaratmış, müstəqillik idealları bu əsasda formalaşdırılmışdır.

AMEA prezidenti əlavə edib ki, Azərbaycan ziyalısının ən böyük inkişaf dövrlərindən biri XX əsrin əvvəlinə – Sovet İttifaqının qurulması tarixinə qədər olmuş, yalnız Heydər Əliyevin ilk dəfə hakimiyyətə gəlişindən sonra Azərbaycan ziyalılığı yenidən formalaşdırılaraq inkişaf etdirilmiş, millli ziyalılıq fenomeni yaradılmışdır.

O, Ulu Öndərin ilk hakimiyyəti dövründə beş yeni ali təhsil ocağının yaradıldığını, eləcə də bir sıra elmi məktəblərin təməlinin qoyulduğunu qeyd edib, Heydər Əliyevin Azərbaycan Milli Elmlər Akademiyasının inkişafına dəstək verdiyini və bu elm məbədinin 1975-ci ildə SSRİ-nin dövlət mükafatlarından olan “Xalqlar Dostluğu” ordeninə layiq görüldüyünü diqqətə çatdırıb.

Akademik İsa Həbibbəyli Ulu Öndər Heydər Əliyevin müstəqillik illərindən sonra da ziyalılara mövqeyini dəstəklədiyini, ziyalılardan ibarət milli parlamentin qurulduğunu vurğulayıb.  

Bu gün Prezident İlham Əliyevin Ümummilli Liderin bütün sahələrdəki fəaliyyətini müasir dövrün tələblərinə uyğun şəkildə uğurla davam etdirdiyini söyləyən Akademiya rəhbəri dövlət başçısının Qarabağda qazanılmış böyük Zəfərlə Azərbaycanın müstəqillik tarixinə öz adını qızıl hərflərlə yazdığını bildirib. Hazırda ölkəmizdə dövlət müstəqilliyinin möhkəmlənməsi, milli-mənəvi dəyərlərin inkişafı, vətənpərvər ruhlu yeni nəsillərin yetişdirilməsi istiqamətinə əhəmiyyətli işlərin görüldüyünü diqqətə çatdırıb.  

Tədbirdə Milli Məclisin Təbii ehtiyatlar, energetika və ekologiya komitəsinin sədri Sadiq Qurbanov, Milli Məclisin deputatı, BDU-nun kafedra müdiri, professor Anar İsgəndərov və YAP Veteranlar Şurasının üzvü, məşhur “91-lər”dən olan professor Şahlar Əsgərov çıxış edərək Ulu Öndər Heydər Əliyevin hələ Sovet hakimiyyəti illərində Azərbaycan müstəqilliyinin əsaslarını qurduğunu, Heydər Əliyevin şəxsiyyəti, siyasi fəaliyyəti və tarixi siyasət məktəbinin Azərbaycanın ictimai-milli şüurunda əvəzsiz rol oynadığını qeyd ediblər. Çıxış edənlər Ulu Öndərin qətiyyət və prinsipiallığı, hərtərəfli hazırlığı, dərin biliyi, geniş siyasi və mədəni dünya görüşü olan rəhbər kimi dünyanın bütün mürəkkəb proseslərindən baş çıxardaraq və dahiyanə qərarları ilə xalq arasında böyük hörmət qazandığını, dövlətçilikdə müstəqillik ənənələrinin möhkəmlənməsində tarixi varislik kontekstində azərbaycançılıq ideologiyasını irəli sürdüyünü vurğulayıblar.

Daha sonra AMEA Rəyasət Heyətinin elmi katibi Coşqun Məmmədov, AMEA Rəyasət Heyəti aparatı Maliyyə və mühasibat şöbəsinin müdiri İlqar Quliyev, AMEA-nın vitse-prezidentinin xidmətinin elmi katibi Arzu Məmmədxanlı, Sənədlərlə iş və protokol şöbəsinin müdiri Əsmər Əliyeva, Elm və təhsil şöbəsinin müdir müavini Vüsal Zülfüqarov və həmin şöbənin baş mütəxəssisi Aynur Günəşli “Heydər Əliyev İli” ilə əlaqədar partiyada ictimai-siyasi fəaliyyətlərinə görə YAP Yasamal rayon təşkilatının Fəxri fərmanları ilə təltif olunublar.