Alimlər tipik bir koronavirus qurbanının portretini tərtib etdilər

Ens.az bildirir ki, Çindən bir qrup alim, Uhandakı iki xəstəxanada koronavirusdan 85 ölüm hadisəsini təhlil etdilər və ən zəif xəstələrin əlamətlərini müəyyənləşdiriblər.

Onlar 9 yanvar - 15 fevral 2020 tarixləri arasında COVID-19-dan 85 ölüm hadisəsinin tibbi qeydlərini toplayıblar. Toplanan məlumatlar arasında tibbi tarix, yanaşı xəstəliklər, simptomlar, laboratoriya nəticələri və kompüter tomoqrafiya haqqında məlumatlar var.

Xəstələrin orta yaşı 65,8 olub, onlardan 72,9 faizi kişilər idi. Ən çox görülən simptomlar qızdırma (91,8 faiz), nəfəs darlığı (70,6 faiz) və yorğunluq (58,8 faiz) idi. Hipertoniya, şəkər və işemik ürək xəstəliyi ən çox görülən yanaşı xəstəliklər olub.

Xəstələrin 81,2 faizi qəbul zamanı çox aşağı qan eozinofillərinə sahib imiş. Fəsadlara tənəffüs çatışmazlığı (halların 94,1 faizi), kəskin tənəffüs çətinliyi sindromu (74,1 faiz), aritmiya (60 faiz) daxil idi. Xəstələrin əksəriyyəti antibiotik (90,6 faiz), virus əleyhinə vasitə (91,8 faiz) və qlükokortikoidləri (76,5 faiz) alıb.

Beləliklə, baxılan ölümlərin əksəriyyəti infeksion olmayan xroniki xəstəlikləri olan 50 yaşdan yuxarı kişilər arasında qeydə alınıb. Onların ölüm səbəbi çox vaxt çoxsaylı orqan çatışmazlığı olub.

Mənbə: rambler.ru