Agentlikdən Piran-Hamarat yolunun dağılmasına - Cavab

Ötən gün də belə bir "yol mühəndisi" video yayıb ki, guya yenicə təmir edilmiş Lerik rayonunun Piran-Hamarat yolunda büdcə talanır, asfaltı düzgün vurmayıblar, yol dağılır. Bu fikirdə olanlara bildirmək istəyirəm ki, həmin yolda təmir-tikinti işləri hələ bitməyib, işlər davam edir, yola müvəqqəti orta xətt çəkilib.

Axar.az xəbər verir ki, sözləri Azərbaycan Avtomobil Yolları Dövlət Agentliyinin mətbuat katibi Anar Nəcəfli naməlum sosial şəbəkələrdə paylaşılan Piran-Hamarat yolunun dağıldığını göstərən görüntülərə aydınlıq gətirərkən deyib.

A.Nəcəflinin sözlərinə görə, kadrlarda göstərilən asfalt örtüyün ilk layıdır. Hazırda yol boyu 2-ci lay asfaltın döşənməsi işləri aparılır və bu işlər yekunlaşmaq üzrədir:

“Yolun bir neçə ərazisində yolun kənarlarında müəyyən problemlər yaranıb və həmin ərazilər yenidən düzəldilib. Bu da tikinti zamanı normal hal hesab olunur. 2-ci lay - hamarlayıcı layın döşənməsi ilə göstərilən "problem" tam olaraq aradan qaldırılmış olacaq.

Kadrlardan da göründüyü kimi yolun kənarları(çiyin hissələr) tam hazır deyil. 2-ci lay asfalt örtük döşənəndən sonra yolun kənarları bərkidiləcək”.

Agentliyin mətbuat katibi bildirib ki, yol tikintisi hər kəsin gözü önündədir və nəyisə düzgün etməmək, gizlətmək qeyri-mümkündür:

“Özünü hər şeydən başı çıxan kimi göstərmək üçün nəsə çəkib paylaşmadan öncə, həmin paylaşımdan da özünə reytinq çıxarmaq üçün xəbər hazırlamaqdan öncə heç olmasa məsələnin nə yerdə olduğunu zəng edib dəqiqləşdirin. Mənə zəng etmək istəmirsiniz, ən azından başı çıxan birindən soruşun”.