90 manat dərdimizə çarə olacaqmı?

Xəbər verdiyimiz kimi 2020-ci ilin yanvar ayının 1-dən dövlət tərəfindən bütün əhali üzrə təqvim ili üçün adambaşına 90 manat icbari tibbi sığorta haqqının ayrılması nəzərdə tutulur. Həmçinin bəlli olub ki, 2020-ci il üçün dövlət tərəfindən səhiyyə sahəsinə ayrılan büdcənin 70-80 faizi icbari tibbi sığortaya sərf olunacaq. Bu prosesin ölkədə mərhələli şəkildə tətbiq olunması təklif olunub.

Nəzərdə tutulub ki, ən bahalı əməliyyatlar sayılan açıq ürək əməliyyatları, şuntlama, stent qoyulması, orqan transplantasiyası, eləcə də ekstrakorporal mayalanma icbari tibbi sığorta zərfinə daxil edilsin.

Mövzu ilə bağlı “Yeni Sabah”a danışan tibb üzrə ekspert, professor Adil Qeybulla 90 manatın az olduğunu bildirib:

“Əslində bu rəqəm çox azdır. Amma bir şeyi unutmamalıyıq ki, hamı bundan eyni səviyyədə istifadə etməyəcək. Lakin icbari tibbi sığortanın təminatı üçün bu az məbləğdir. Hər halda bu iş başlayanda müəyyən nöqsanlar olacaq. Düşünürəm ki, vaxt ötdükcə bu nöqsanlar aradan qalxacaq. Onu da mütləq qeyd etməliyəm ki, bu proses ölkənin iqtisadi vəziyyətinə çox bağlıdır. İstənilən halda tibbi icbari sığortaya ayrılan vəsait ümumi səhiyyə üçün ayrılmış vəsaiti bütövlükdə götürsək belə çox azdır. Amma bu o demək deyil ki, bu sığorta səhiyyənin bütün problemlərinin həlli olacaq”.

Professor həmçinin bildirib ki, hələ ki bu prosesdə aydın olmayan məsələlər çoxdur:

"Bir neçə gün öncə sığortanın ümumrespublika olacağı bildirilmişdi, amma indi sığortalanmanın region-region mərhələli şəkildə keçiriləcəyi açıqlanıb. Hər rübdə 1 region sığortaya cəlb olunacaq”.