II. Abdülhamid - Adana Katliamı/Muhtaç durumdaki Ermenilere yardım edilmesi talebi / Adana'da yeniden başlayan olaylara karşı tedbir alınması

Telgrafnâme
Mahrec Merkezi: Haleb
Mahalli Numarası: 6192

Huzur-ı Sâmî-i Cenâb-ı Sadâret-penâhî'ye

Vilâyet dahilinde Kırıkhan'da ve Cisr Kazası'nın Keseb karyesinde vâki olan ahvâl-i müessifeden nâşi Kırıkhan'dan Belen'e ve Keseb'den Lazkiye'- ye iltica eden ve Adana'nın Bahçe cihetlerinden Maraş kurâsına gelen Ermenilerin ale'l-ekser hâneleri ihrâk ve eşyaları umumen yağma edilmiş olduğu cihetle bunların aç ve çıplak bırakılmaları caiz olamayacağından kendi kendilerine te’min-i maişet edinceye kadar iâşeleri için hükûmetçe mebâliğ-i kâfiye tahsisine müsâra‘aten müsaade ve keyfiyetin emr u irâde buyurulması müsterhamdır.

Fî 14 Nisan sene 325

Haleb Valisi
Reşid

Sadâret-i Uzmâ
Mektubî Kalemi
Numara: 294
Tarih: 8 Rebîülâhir sene 327 - 15 Nisan sene 325

Adana Vilâyeti'ne

Merkez-i vilâyetde iğtişâşâtın teceddüd etdiği haber alındığından bu bâbda olan malumâtın ve el-hâletü hâzihî vilâyetin hangi mevkilerinde sükûn hâsıl olup hangi mevkilerde müsâdemât devam etmekde bulunduğunun ve oralarda el-yevm ne mikdar asker mevcud olduğunun hemen iş‘ârıyla beraber kumandanlıkla bi'l-muhabere sükûn hâsıl olan mahallerden mümkün olan kuvvetin hemen bi't-tefrîk icab eden mahallere sevki ve tarafeyne rüesâ-yı ruhâniye ve müteneffizân vesâtatıyla tekrar nesâyih-i müessire icrasıyla müsâdemâta bir dakika evvel nihayet verilmesi esbâbının istikmâline derece-i nihayede gayret edilmesi kemâl-i ehemmiyetle tavsiye olunur.

İdare-i Mahsusa Nezâreti'ne

Hudeyde Vapuru'yla sevk olunan askerin Mersin'e ne vakit vâsıl olduğunun serî‘an tahkik ve iş‘ârı.